الشباب والحب اليومين دول .. زي التطور الطبيعي للحاجه الساقعه !

مشاكل في الحب
الشباب والحب
مشاكل عاطفيه للشباب

عناوين كتير نقدر نكتبها على الشباب ومشاكلهم العاطفيه

دلوقتى

الكل بيحب
الكل بينجرح
الكل بيتألم
الكل هايص

كل الاعمار ماشاء الله

مفيش حد اسمه مبيحبش ولا اسمه معندوش مشكله عاطفيه بداية من ناس عندها 11 سنه !!!!!!!

لحد ناس عندهم 20 ولا 21 سنه لأن أغلبية الناس اللى بتحب وكل مشاكل الحب بتبقى في الاعمار دي

الكل بيتألم .. الكل مجروح .. الكل بيفكر يصارح اللى بيحبه ازاى .. الكل بيسمع عمو اسامه منير .. الكل سهران يفكر في الدوو

وكلهم مجمعاهم دايره إسمها : ( سن المراهقه )

اللى هى تحت شعار ( كلنا لازم نحب )

نحب وخلاص يعنى اصلنا مستعجلين
لازم نحب ونبقى زي بيسو وجيجي وسوسو ومودي

طبعا كلنا عارفين سن المراهقه وفيه ناس وشباب وبنات كتيــره جداً بينضجوا وعقلهم وتفكيرهم بينضج قبل حتى ما يكملوا 17 سنه

أى بنت وأى ولد مرتبط عاطفياً وعندو مشكلة عاطفيه

اللى مش عارف يقول للى بيحبها بيبحها ازاى
واللى كانت بتحب واحد وسابته واتخطبت لغيره وسابته ومش عارفه ترجع للاولانى ازاى
اللى واحد بيحبها وهى بتحب واحد تانى ومش عارفه تقوله ازاى
اللى بيحبوا بعض بقلهم سنتين ومش قادرين يقولوا لبعض لانهم خايفين يخسروا بعض
اللى بتحب واحد وهو بيحب بنت جوز ابن خالة عمتها

وهما سايببين الحجات الأهم ومستقبلهم ومزاكرتهم ومركزين في الحب وينجرحوا ويعيطوا
لو جم يفكروا بعقلهم للحظة ممكن يحسوا ان اللى هما فيه ده حاجه هايفه بالنسبه لحجات كتير
انا مقلتلهمش ميحبوش بس مستقبلهم أهم وحب الله أولى وأحلى
المهم .. زي ما قلت دلوقتى الكل شاغل نفسه بالحب والكل بيحب اى حد يقولك انا عندى مشكله عاطفيه !
وممكن تلاقي عيل صغير 10 11 سنه ويقولك عندى مشكلة عاطفيه

مشكلة عاطفيه مين يابنى انت عارف يعنى ايه عاطفيه اساسا ؟!!!!

(( لدرجة إنى في يوم من الأيام بالصدفه والله لقيت واد عندو 12 سنه بيقول : أنا حبيت واحده معايا في الفصل وهى بردو حبتنى ولما عرضت عليها الفكره هى فرحت اوى ورحبت بالموضوع بس فجأه وفي يوم من الأيام لقيتها ماشيه مع واحد صاحبي وخانتنى وانا من ساعتها مجروح أوى .... الخ ))

بجد يا جماعه الكلام ده الواد كان بيقولوا بجد
يعنى انت يا عم سبت للى اكبر منك انه يقولوا ايه !!!

طبعا لازم محدش يستغرب لأن الحب بيبدأ من السن ده , وجيل الأيام دي غير زمان يعنى من الاخر منستهونش بيه لانه ميعتبرش صغير, ده غير طبعا إن الحب ملوش سن
وعموما ( دى حاجه خلقنا عليها ربنا ومنقدرش نغيرها ) ومينفعش حد يستهتر بمشاعر الناس
وأنا بكلامى مش قصدي إنى أستهتر بمشاعر حد ولا إنى أستعيل حد لا الحب لاهو عيب ولا حرام
بس حكاية لا عيب ولا حرام وحكاية الحب ملوش سن دي بقى للى يقدر ويفهم الكلام ده
ويعرف من الأول أصلا معنى كلمة ( حب ) يفهم معنى ( المشاعر والأحاسيس ) ويعرف يعنى إيه ( ارتباط ) ... وده أهم حاجه .

_-_-_-_-

هبدأ بأهم وأكتر مشكله منتشره

وهى حاجه اسمها ( الإستهتار في الحب ) أو ( الحب للحب ) من الاخـر ( تسليه ) !!!! وأنا بصراحه شايفه إن كلهم واحد

وإن دلوقتى الشباب بقوا بيستهتروا في الحجات دى يعنى اى حد عايز يحب للحب بس .. يبقى اسمه بيحب .. مهوش عارف اصلا يعنى ايه كلمة ( بحبك )
ولا هو مقدر النتايج والحجات اللى المفروض تيجي بعد الكلمة دي .. ممكن أى شاب يقول لأى بنت انا بحبك وكل ما يشوفها يقولها كلام حب وهو الواد مش حاطط في دماغه أسـاساُ ...............
اخدها لعبه يعنى عمره مثلا ما فكر اذا كان هيجوز البنت اللى هاريها اغانى واشعار ليل نهار دي ولالا طب واخرتها يا عم روميو ؟

بتتسلى يا عم طب ليه كده اسلى في حاجه مفيده احسن روح ذاكر سيب البت في حالها يا بن الناس مدام مش هتجوزها دى متعلقه بيك وبتحبك معندكش اخوات بنات ؟

يرد عليك ويقولك إحنا بنحب بعض ومش شرط اننا بنحب بعض يبقى احنا هنجوز في الاخر احنا بنحب للحب !!!! ( ملحوظة مهمه : ده الرد بتاع كل الشباب الايام دي وده لمجرد بس ان هما عايزين يحبوا وخلاص )

الحب اللى هما بيكلموا عليه ده اساسا واللى بيقولوا انهم بيحبوا للحب بيبقى قصدهم ايه يعنى بيفضلوا يحبوا في بعض ويفرغوا طاقاتهم المكبوته ؟! هو كده اساسا مبيحبش البنت دي لانه معلقها بيه ومش بيرسوا على بر ( لو بتحبها بجد يا عم مكتش هتوقف حالها جنبك ) وفي الاخر هما مش لبعض وطبعا انا مبكلمش على الشباب يعنى

مبكلمش على الولاد بس لا في بنات كتير بيعملوا كده واخدها تسليه اكلم مع ده واحب ده شويه وازهق من ده اصاحب ده وامشى مع ده واروح على ده وفي الاخر هكون اكتسبت خبره في الاخر ....
واقدر اختار شريك حياتى ( ده التفسير بتاع البنات دي والتطور الطبيعي للحاجه الساقعه )

وده من ورا اهاليهم يا سلام هما مش هيتحاسبوا ع الكلام ده ؟
يعنى من الاخر نزوه يعنى من الاخر بيجربوا يعنى من الاخر بيسلوا يعنى من الاخر مهماش عارفين انهم الحب للحب اللى هما بيكلموا عليه ده ممكن يلاقوه في حته تانيه
حبهم لامهم وابوهم اللى بيزعلوهم كل يوم وبيسامحوهم حبهم لاخواتهم اللى مش قادرين يصاحبوهم حبهم لقرايبهم اللى مش قادرين يفهموهم والأهم من ده كله
حبهم لربنا اللى هما ناسيينه أساساُ !
مهماش عارفين انهم هيتحاسبوا على ده وعلى كل حاجه بيعملوها
واللى هما قادرين عليه انهم يقولولك الحب لا عيب ولا حرام . ( حب مين يا عم انت هتجنني ) !!!

يعنى من الاخر يا جماعه كل الـ لك والرغي والكلام الكتير ده هو بجد بيجمع جميع مشاكل الشباب اللى في الحب بأنواعها اللى كلها مجمعه في حتة ( الاستهتار ) دى
ده غير حاجه اسمها ( حب النت ) (( اللى عيزالها موضوع لوحده ))
اظن تسمعوا عنها لان الكل دلوقتى بيجربها واهى احسن واسهل طريقه ! والاشتغالات و و و ..... الخ اللى برده في نفس دايرة الاستهتار ...
وانهم مش فاهمين معنى الحب وبيستهتروا بكلمة بحبك
مش عارفين ان لما واحد يقول لواحده كلمة بحبك يبقى دي مسؤوليه
كلمة الكل يبنطقها بكل سهوله ومش عارف اللى بتحملها من معانى

أنا بس في الاخر أقولكوا معنى كلمة بحبك .. ومعنى كلمة ( حب )

لو حسيت الكلمة بجد هتفهمها

الحب

يعنى عطاء ( ادى ومتستناش تاخد )
يعنى مسؤوليه ( واضحه طبعا )
يعنى وفاء وإخلاص
يعنى نحترم بعض ونحترم آراء بعض
يعنى تخاف على الطرف الاخر
يعنى اللى ما بينكم يبقى حب طاهر وشريف
يعنى اللى ما بينكم تبقى مشاعر صادقه
يعنى محدش يبخل على التانى في مشاعره ( بالبلدى يتقل يا قطاقيط )
يعنى محدش يستهتر بمشاعر التانى
يعنى كل واحد يحاول يغير عيوب الطرف التانى للأحسن ... إلخ
يعنى ارتباطنا ببعض من الاول جد مش لعب عيال
يعنى الحب و كل اللى ما بينا ده في الأخر أخرته جواز ونهاية سعيده

أحب أعرفكم معنى الجواز اللى ناس كتير فهماه غلط !

(( مش زي ما الكل بيفهمها لما يقولك الحب اخرته جواز يبقى الحب هينتهى بعد الجواز وده غلط جدا

لان الجواز ده اساسا مش نهاية لان دي بداية علاقه جديده زي ما تكونوا لسه بتعرفوا بعض يعنى
بداية حب من نوع تانى خالص

احترامنا لبعض هيزيد وحبنا بعد الجواز هيزيد من الطبيعي هيبقى في مشاكل لكن هنحب بعض اكتر ولا لا هنفهم بعض اكتر ولا لا هنحترم بعض اكتر ولا لا العشره دي بس يا ناس هتخلي الحب يزيد في قلبكوا ولا لا البيت اللى انتوا فتحتوه والمسؤوليه اللى بقت عليكم والله دى حاجه جميله تخيلوها ... إلخ ))

يعنى من الاخـــــر حب ربنا الأول قبل ما تحب حبيبك واتقى الله فيه واحترمه واخلصله واعرف ان مدام قلت لواحده بحبك يبقى دي هتجوزها في الاخر
والبنات والشباب المراهقين اللى لسه سنهم صغير لازم قبل ما يحبوا بقلبهم يفكروا حبه بعقلهم ويعرفوا ان زى ما هما هيحبوا
وطبعا هيحبوا بصدق واخلاص زي ما هما لازم يعرفوا ان مستقبلهم اهم

زي ما الكــل لازم يعرف انه لازم ميستعجلش انه يحب
والله الحب هيجي لوحدو
محدش يستعجل ده الحب بهدله زي ما بيقولوا

وان لازم مشاكلهم وحبهم ده ميدخلش على مستقبلهم او انها تقلل علاقتهم بربهم واو انها تنسيهم الناس اللى حواليهم
أو انها تأثر على أى حاجه أهم في حياتهم عموما ً ...

خلاصة الكلام اننا لازم منستعجلش على اننا نحب الحب هييجي لوحده لازم منستهترش بالحب بس لازم الحب ده ميشغلناش عن حجات تانيه اهم بمستقبلنا ومزاكرتنا لازم لما نحب نحب من كل قلبنا ونعرف ان الحب اخرته حاجه واحده اللى هى الجواز .

يعنى بصراحه من الاخر من الاخر انا طووووووووووووولت عليكوا جداً
والكلام ده كان نفسي اكتبه بجد من زمان

عارفه ان في ناس كتير ممكن ميعجبهاش الكلام بس بجد يا جماعه الكلام ده مش من عندى
لان ده اللى بيحصل فعلا الايام دى وكلنا عارفين كده ولازم نعقل نفسنا شويه

ويارب يكون عجبكوا واكون قدرت أوصلكوا فكره كويسه وكلام كويس وليه معنى .

بجد يا مودى انا مش عارف اوصف موضوعك ازاى
كلمه هااايل دى قليله جدا على الموضوع
و فعلا مفيهوش ولا كلمه غلط و طبعا فعلا مشكله كبيره اوى الحب بتاع الصغيرين ده لانهم ممكن يضيعلهم مستقبلهم

و اكتر حاجه ضحكتنى ف الموضوع ده الجمله دى
(( لدرجة إنى في يوم من الأيام بالصدفه والله لقيت واد عندو 12 سنه بيقول : أنا حبيت واحده معايا في الفصل وهى بردو حبتنى ولما عرضت عليها الفكره هى فرحت اوى ورحبت بالموضوع بس فجأه وفي يوم من الأيام لقيتها ماشيه مع واحد صاحبي وخانتنى وانا من ساعتها مجروح أوى .... الخ ))

هههههههههههههه santa

و ســــــــوبر عليك يا نجم منتدى الشباب lol!

ايه الابداع دا الله عليك يا مودى بجد انا بجد الموضوع عجبنى وشدنى لدرجه انى حبيت اقراه مره تانيه بجد جاااااااااااااااااااااااامد اوى يا مودى .

انا مش عارفة اقولك ايه
بجد الكلام دة مفهوش ولا حاجة غلط
كلامك كله صح جدااااااااااااااااااا وتمام اووووووووووووووووووووووووووووووى
وانت بتقول فيها
((((انا والله يا جماعة شايفة اتنين ولد وبنت واقفين مع بعض ميكملوش 4 او 5 ابتدائى ودة بيقولها انتى ممكن تبعتى لصحبك على الايميل بتاعه وتقعدوا تتكلمو باليل ودول الى اسمهم اطفال)))))

ربنا يهدى الجميع
والاهل بردو ليهم دور فى مراقبة اولادهم وافكارهم ومشاعرهم
وميرسى على موضوعك الجامد اوى دة يا مودى

ههههههههههههههههههة الله الله عليك يامودى ولله انتا واد جامد وروش
انا اول مرة احب كنت فية رابعة ابتدائى هههههههههههههههههههههة
شكرا يامودى
بس انا اتجرحت اووووووووى
هههههههههههههههههههههههة