طبعا كلنا شفنا ازاى السجاير والشيشه انتشرت فى مجتمعنا فى الفتره الأخيره بالصورة البشعه ده , ماشى انا معاك ان كل واحد حر لكن اللى ضايقنى اوى ان زمان لما كان فى حد يشرب سجاير كان بيكون مكسوف من نفسه اوى ويكون بيشربها من ورا الناس , لكن فى الزمن اللى احنا فيه تيجى تتكلم مع واحد صاحبك بيشرب سجاير تلاقيه بيقولك بمنتهى الجرأه وايه يعنى ....؟؟؟!!!!!!
وساعات كمان تلاقيه بيقولك ده انا بأشربها فى البيت ادام ابويه وساعات كمان بنولع سيجارتين مع بعض ....... .
معقول احنا وصلنا للمرحله ده ,المرحله اللى فيها الأب والأبن بيشربوا سجاير مع بعض بس ارجع واقول ان السبب ورا الظاهره ده هو حاجتين :
1 - ان 70 % من المدخنين من الشباب طلع لقى والده بيشرب سجاير عادى فى البيت والصوره ده اصبحت طبيعيه فى ذهنه وفى نفس الوقت ان والده فى نفس الوقت لايملك الا ان ينصح ابنه بمنتهى الهدوء ان يكف عن هذا لكن لا يستطيع ان يقف وقفه قاطعه معه لأنه قد سبقه بهذا الفعل .
2 - تقريبا محدش بدأ شرب السجاير بعد 18 او 19 سنه على اقصى تقدير ولو مش مصدقنى اسأل اى حد بيشرب سجاير , وعدد كبير من الشباب فى المرحله ده بيكون عاوز يحسن بنفسه انه راجل زى ما بيقولوا وللأسف عشان مش لقى حد يوجهه ويقوله فين الصح من الغلط والأسره اصبحت بالنسبه له أب كل ما يشوفه يهزأه ويقوله جيل بايظ و أم كل ما تشوفه برضه تفضل تشتكى منه لصاحبتها وجيرانها من ابنها البايظ ( ده على كلام ناس اعرفهم مروا بالتجربه ده ) وانا فى رأيى ان الأسره مسئوله عن جزء كبير من اللى حصل مع ابنهم وانا فى رأيى برضه ان الأبن ده مظلوم انه مش لقى حد يكلمه بالراحه ويتناقش معاه بمنتهى الديموقراطيه اللى غابت من مجتمعنا خالص واصبحت مجرد سراب .
للسبب الأول او التانى شرب الولد السجاير وبعد كده شاف واحد صاحبه مبيشربش وقاله خد جرب ولا خايف والتانى بقى بمنتهى الرجوله قاله انا مش بخاف من حد وشرب معاه وانتشرت السجاير .... , وبعد كده دخل كمان على المرحله التانيه فى رحلة الضياع وشرب شيشه مع اتنين صحابه على قهوه وعجبته وبعد كده معدش بيحس بيها فاضيه ( زى ما بيقولوا ) ودخل بعد كده على المرحله التالته وقرب من نهايه الطريق بالمخدرات .
المصيبه كمان ان اليومين دول انتشر اعتقاد معرفش جابوه منين ان الشيشه ده عادى جدا يعنى زى ما تشترى لب مثلا , ولما تيجى تتكلم مع واحد يقولك لأ الشيشه غير السجاير خالص عشان الشيشه مش ادمان وعادى لما تقعد مع صحابك وتشرب شيشه المهم انك مش بتشرب سجاير عشان السجاير غلط وادمان وهضيع فلوسك . وفعلا تلاقى شباب كتير بيشرب شيشه ورأيه فى السجاير انها غلط ....... سبحان الله ........ .
طيب اللى فات ده السبب المنطقى ان الولد يشرب سجاير ..... , حد يقولى بقى ايه اللى يخلى بنت برضه فى نفس السن 18 او 19 سنه تشرب سجاير او شيشه؟؟!!!!
برضه عايزه تحس برجولتها ولا ايه ؟ بجد انا مش فاهم ....!!!!!!
والمشكله الأكبر انك لما تدخل cafe دلوقتى تلاقى عدد البنات اللى جوه تقريبا نفس عدد الولاد وده فى حد ذاتها مشكله , والمصيبه بقى انك تلاقى بنات على وشهم كل الأنوثه وعمرك ما تتوقع منها غير انها تكون فى منتهى الرقه تلاقيها بتنادى على اللى شغال وتقوله شيشه ليه ولصاحبتى , بجد انا صعقت لما شفت الموقف ده بعينى . واللى يضحك اكتر انها عشان بنت وعشان المفروض تكون رقيقه تلاقيها جايبه المبسم ( الجزء اللى فى اول الشيشه ) معاها وهى جايه اصلها بتقرف تشربها مكان حد تانى .......... .
فعلا بنت نضيفه ..... وكمان رقيقه ....... !!!!!!!!!!!!!!!!!!!!!!!!!!!!!!!!!!!!!!!!
- اما بقى الأب اللى بيشرب سجاير , انا طبعا عارف انك حر وفى نفس الوقت انت قادر على التفكير وعلى الحكم الصح على الأمور ,انا عاوز اقولك كلمتين :
- اقعد كده وفكر مع نفسك شويه فى رد ممكن تقوله لأبنك لما لقيته بيشرب سجاير ؟!!!!!! هتقولى ابنى محترم وانا هقولك يعنى انت مش كنت محترم !!! صدقنى مش ليها اى علاقه بالاحترام وممكن يحصل لأى ولد فى السن ده .
- مهما كانت الظروف اللى انت شربت فيها السجاير زمان انا دلوقتى متأكد ان الظروف ده انتهت وانك دلوقتى قادر على ان تقلع عنها,انا معاك ان العمليه مش سهله لكن ممكنه .
انا مش هافضل اعدد ليك اضرارها الصحيه اللى كل الناس عارفينها , انا هقول ليك فكر فى ابنك او حتى بنتك عشان انا متأكد انك مش عاوزهم يكونوا زيك فى شرب السجاير , وكمان انت مفروض عليك وهتتحاسب انك لم تكن قدوه صالحه لأبنائك بغض النظر اذا كانت السجاير حرام او حلال .
({ كلكم راع وكلكم مسئول عن رعيته })
ارجو من اللى قرأ المقال ده انه يخلى كل المدخنين اللى يعرفهم يقرأوا المقال ده يمكن واحد فيهم يتأثر ويسيب التدخين وصدقنى كلنا هناخد ثواب اللى بطل التدخين على ايدينا , وبلاش اسمع كلام انه عيب اقول لواحد كبير كده ؟ النقاش مادام يلتزم بالأدب وآداب الحوار عمره ما كان عيب .
سيدنا عمر بن الخطاب كان بيسمع رأى الشباب وبياخد بيه اذا كان صح , اللى بيشرب سجاير ده هيكون احسن من سيدنا عمر ( لا سمح الله ) عشان مش يسمع لينا مادمنا بنتكلم صح وبلتزم بالآداب فى الكلام معاه .
بالعكس انا اظن انه هيتبسط لما يلاقى حد بيكلمه كده وممكن كمان يبطل السجاير وممكن تكون انت السبب لما تخليه يبطل .
......الله اعلم .......
8/10/2008, 3:23 pm
